India rama college tha thlan chhuah zinga tel hial khawpa PUC in hma a lo sawn ta hi a ropui ka tiin ka lawm a. He dinhmun a thlen theih nana beitute zawng zawng chungah lawmthu ka sawi a ni, a ti a, "Hriselna leh zirna lama sum sen hi kan sawrkar chuan expenditure ah kan ngai lova investment a ni," Chief Minister chuan a ti.

Chief Minister chuan, Hand Holding Policy kan tan dawn hnai a, thawhpui tlak thalaite chu tumah thlei bik nei lovin Rs. 50 lakh thleng loan awlsam an lak theihna, interest free ni bawk si kan chhawp dawn a ni. Hetiang Policy nei state awmchhun hi kan ni mek a. He hmalakna chhawr thei thalai, mahni kea ding tlak thiamna nei, thawhpui tlak lo buatsaih ula, vawiina zirlaite pawhin chutiang mi chu nih rawn tum ang che u, tiin a sawm a ni. Eirukna leh thil tha lo tinreng laka inthiarfihlim turin a chah bawk.

Dr. Vanlalthlana pawhin thusawiin, PUC thawktute zawng zawng chungah lawmthu a sawi a. In zarah NE India-a NIRF top 100 college nei thei awm chhun state kan ni a, kan chhuang em em a ni, a ti. Thalai lehkhathiam, chhawr tlak tam zawk chher chhuah tumin i bei sauh sauh ang u, tiin a sawm a ni.

Prof. Lalhriatzuala, Asst. Coordinator, IQAC chuan National Institutional Ranking Framework in tehfung hrang hrang hmanga zirna in tha an teh dan sawifiahna a nei a. NIRF chu Ministry of Education , Government of India in zirna in sang te that dan endiktu tura a thlan te an ni a. PUC hi kum 2018 khan an tel ve tan a, 101 leh 150 inkarah an awm a. A hnuah pawh top 100 ah an kai mai lova, kum 2022 ah khan ram puma 45 naah an tling chho ta a, kum 2023 ah 34 na niin kuminah 35 na an ni leh ta a ni. India hmarchhaka PUC hnaih bertu Patkai Christian College chu 101-150 rank band-ah a awm a, college hlun tak St. Anthony's College chu rank band 201-300 ah a awm. Anni pahnih bakah Nowgong College (rank band 201-300) tih loh chu India hmarchhakah hian lang pha an awm lo.

Ranking lawmna inkhawmah hian Rev. Dr. Lalrokhuma Hmar, Head, History of Christianity Department, Aizawl Theological College chuan lawmthu sawina hunserh a hmang a, Prof. Vanlalchhawna, Finance Officer, MZU chuan Mizoram University aiawha thu sawiin Dr. Margaret Z. Khiangte, Vice Principal, PUC chuan lawmthu sawiin inkhawm a khar a ni.